සිංහල හා දෙමළ අලුත් අවුරුද්ද හෙට උදාවෙයි - පුණ්‍ය කාලයට තවත් හෝරා කිහිපයයි

හෙළයේ මහා සංස්කෘතික මංගල්‍යය, සිංහල හා දෙමළ අලුත් අවුරුද්ද හෙට (14) උදාවීමට නියමිතව තිබේ. 

රාශි චක්‍රයේ සූර්යයා මීන රාශියෙන් මේෂ රාශියට සංක්‍රමණය වීම අලුත් අවුරුදු උදාව ලෙස සැලකෙයි.

උදාවෙන අලුත් අවුරුද්දේ සුබ නැකැත්වලට අනුව චාරිත්‍රවාරිත්‍ර සිදුකිරීම අතීතයේ පටන් පැවති සම්ප්‍රදායකි.

නැකත් සීට්ටුවට අනුව අලුත් අවුරුද්ද උදාවන්නේ හෙට (14) පූර්වභාග 09.32ටය.

අවුරුදු උදාවට පෙර පුණ්‍ය කාලය ආරම්භ වන අතර එය 14 වැනි අඟහරුවාදා පූර්වභාග 03.08 සිට අපරභාග 03.56 දක්වා පවතිනු ඇත.

එම කාලය තුළ සියලු වැඩ අත්හැර, ආගමික වතාවත්වල යෙදීම යෝග්‍ය වන අතර පුණ්‍ය කාලයේ අපර කොටසේදි ආහාර පිසීම, වැඩ ඇල්ලීම, ගනුදෙනු කිරීම ආදි නැකත් චාරිත්‍රවල යෙදීම සුදුසුය. 

ආහාර පිසීමේ නැකත යෙදී ඇත්තේ 14 වැනි අඟහරුවාදා පූර්වභාග 10.51ට යෙදී ඇති බව නැකත් සීට්ටුවේ සඳහන්.

රක්ත වර්ණ වස්ත්‍රාභරණයෙන් සැරසී දකුණු දිශාව බලා ලිප් බැඳ ගිනි මොලවා කිරිබතක්ද කැවිලි වර්ගයක්ද දී කිරි සහ විළඳ ද පිළියෙළ කර ගතයුතුය.

වැඩ අල්ලා ගනුදෙනු කොට ආහාර අනුභව කිරීමේ නැකත යෙදී ඇත්තේ 14 වැනි අඟහරුවාදා අපරභාග 12.06ටය.

රක්ත වර්ණ වස්ත්‍රාභරණයෙන් සැරසී දකුණු දිශාව බලා වැඩ අල්ලා ගනුදෙනු කොට ආහාර අනුභවය කළ යුතු බව නැකැත් සීට්ටුවේ සඳහන්ය.

උදා වන සිංහල හා දෙමළ අලුත් අවුරුද්දේ හිසතෙල් ගෑමේ චාරිත්‍රය අප්‍රේල් මස 15 වැනි බදාදා පූර්වභාග 6.55ට යෙදී තිබේ.

පච්ච වර්ණ හෙවත් කොළ පැහැති වස්ත්‍රාභරණයෙන් සැරසී නැගෙනහිර දිශාව බලා හිසට කොහොඹ පත් ද පයට කොලොන් පත් ද තබා කොහොඹ පත් යුෂ මිශ්‍ර නානු හා තෙල් ගා ස්නානය කිරීම සිදු කළ යුතුය.

හදිසි රාජකාරී සඳහා පිටත්ව යාමේ නැකත අප්‍රේල් මස 17 වන සිකුරාදා පූර්ව භාග 5යි 38ට යෙදී ඇති අතර අප්‍රේල් මස 20 වන සදුදා පූර්ව භාග 6යි 27ට හෝ පුර්ව භාග 6යි 50ට රැකී රක්ෂා සදහා පිටත්ව යාමේ නැකත යෙදී තිබේ.

එමෙන්ම අප්‍රේල් මස 23 වන බ්‍රහස්පතින්දා පූර්ව භාග 9යි 01ට පැල සිටුවීමේ නැකත යෙදී ඇති බව නැකැත් සීට්ටුවේ සඳහන්ය.